O emprego do galego nos diferentes ámbitos da nosa sociedade dista moito de cumprir a lexislación. Así o asegura Carlos Callón, presidente da Mesa pola Normalización Lingüística, quen vén de criticar a actitude do Partido Popular, así como a de "poderosos grupos económicos e mediáticos" por considerar que hai linguas "de primeira e de segunda". Callón ofrece datos para amosar que a realidade é ben diferente á que defenden estes colectivos: no ámbito da educación o galego está lonxe de cumprir os parámetros legais estabelecidos.